ازاي نبدأ مع الاطفال في البيت؟

ازاي نبدأ مع الاطفال في البيت؟

⭐️ نمنع الموبايل و التابلت لو متعلق بيهم نفطمه الاول قبل اي حاجة.

⭐️ اهتمي بنفسك الاول لان لو انتي متوترة الطفل هايحس و مش هايركز معاكي. لو هاتعملي معاه نشاط افنعي نفسك انك هاتعملي حاجة بتحبيها و اوعي تزعقي او تضربي في وقت النشاط لو اتعصبتي وقفي و كملي لما تكوني رايقة. 

⭐️ ١٠ دقايق انشطة في اليوم كفاية لو انتي و الطفل عملتوها كانها لعبة انتم حابينها. 

⭐️ ممنوع الافلام و المسلسلات بتاعة التلفزيون قدام الطفل فيديوهات تعليمية او كرتون مفيد بس. 

⭐️ تتكلمي كتير مع الطفل و تعلميه بطريقة غير مباشرة. يعني ممكن لما يجي ياكل نقوله تحب تاكل تفاحة.. تاء تفاحة لونها احمر جميلة. و ممكن تدخلي انجليزي بردو تاء تفاحة لونها احمر و مره تانية A a a apple, red apple. و بس من غير ما تشرحي و كده بقي لما تيجي تلبسيه. و الارقام و العد بنفس الطريقة. 

⭐️ لما تيجي تمنعيه من حاجة فهميه السبب و ممكن تدخلي علي اليوتيوب و تجبيله فيديو لدكتور بيشرح حتي لو هو مش هايبقي فاهم الكلام. مثلا الموبايل،ادخلي علي اليوتيوب و اكتبي اضرار الموبايل علي الطفل و فرجيه و دي تنفع حتي مع الطفل اللي عنده سنتين. الطفل الصغير النتيجة مش بتبان في ساعتها بس هاتشوفيها مع الوقت ان شاء الله. 

⭐️ مانقولش للطفل تعالي نذاكر،قوليله تعالي نعمل انشطة

⭐️ لو الطفل كبير شوية خليه يختار معاكي النشاط. جمعي كام نشاط و خليه يختار. 

⭐️ نحدد عايزين نعلم الطفل ايه نكتب ورقة فيها كل حاجة عايزين نعلمها للطفل و نبدأ ندور علي الانشطة اللي تخليه يستخدم حواسه. كل ما يستخدم حواس اكتر كل ما المعلومة تثبت افضل.

⭐كل حاجة ممكن الطفل يتعلمها من غير ما نقعد نكتب الكلمة ١٠ مرات حتي الكتابة نفسها بنتعلمها بالانشطة مش بالتكرار. 

⭐️ لو الطفل حركي اختاري الانشطة اللي فيها حركة كتير

⭐️ الوقت اللي انتي مش فاضية فيه شغليله فيديوهات اليويتيوب علي التلفزيون. ممكن تجيبي فلاشة و تحملي الفيديوهات عليها او تشغلي اليوتيوب علي التلفزيون علي طول و احلي حاجة لو يوتيوب kids بس تكوني متحكمة في نوعية الفيديوهات اللي يشوفها. انا بفضل الفلاشة لانك ممكن تنزلي الفيدسوهات و تسبيها شغال تعيد مع نفسها و حتي لو الطفل مش قاعد مركز في التلفزيون هايتعلم بردو. و اكيد اي حاجة بتزيد عن حدها بتقلب سلبية.

⭐طريقة استخدام يوتيوب kids

https://www.youtube.com/watch?v=PvGMq0ZSZdQ&t=130

⭐التلفزيون شغلي فيديوهات لغة عربية فصحي او انجليزي او اي لغة حابة تعلميها للطفل بس! بلاش اللغة العامية خالص لانه كده كده هايتعلمها ان شاء الله.

⭐️ نزلي تطبيق Pinterest علي موبايلك هايسعدك في اختيار الانشطة.

نزليه من هنا https://play.google.com/store/apps/details?id=com.pinterest

⭐بتدخلي علي التطبيق و تكتبي في البحث السن او المادة اللي حابة تشوفي افكار انشطة عليها.

⭐️ ماتنسيش.. اوعي تتعصبي في وقت النشاط 😍

زي ما في المدرسة المدرسين بيحضرو للدروس ممكن نعمل ده في البيت بس بطريقة ابسط.

اكتبي مجموعة اهداف يومية

مثلا

⭐️ اذكار الصباح مع الطفل

⭐️ سماع قران علي الاقل ريع ساعة الصبح

⭐️ ترتيب السرير (لو صغير قوليله هساعدك ماتقوليش ساعدني عشان يعرف انها مسؤليته هو) 

⭐️ رياضة لمده ١٠ دقايق

⭐ نشاط تعليمي لمده ١٠ دقايق

اكتبيهم حسب وقتك و وقت الطفل و خليها حاجات بسيطة ماتاخدش مده طويلة بس تستمري عليها.

و اهم حاجة ماتضغطيش علي نفسك ولا علي الطفل و ماتستعجليش خليه ياخد وقته في التأسيس حتي لو متأخر في المدرسة. يتأخر سنة او ٢ بس يتأسس صح افضل.